नगर:
नगर दौऱ्यात शरद पवार आखणार जिल्ह्यातील विधानसभेची रणनीती!!
#स्व.अशोकराव भांगरे जयंती सोहळ्यास आज शरद पवार अकोले शहरात
नगर:
शरद पवार आणि अकोल्याचे घट्ट नाते
अकोले मतदातसंघ आणि पिचड कुटुंब असे गेले कित्येक वर्षांचे समीकरण २०१९ला किरण लहामटे यांनी बदलवले. प्राप्त परस्थितीत पिचड पिता-पुत्र भाजपवासी झाले. शरद पवार यांची कित्येक वर्षे साथ देणारे आणि राज्याच्या विधिमंडळात निवडून जात मंत्रिमंडळात मंत्री असलेले जेष्ठनेते मधुकर पिचड यांनी त्यावेळी घेतलेला निर्णय आश्चर्यकारक आणि पवारांसाठी धक्कादायक होता. २०१४ च्या मोदी लाटेत जेष्ठनेते मधुकर पिचड यांचे पुत्र वैभव पिचड एकसंघ राष्ट्रवादी कडून निवडून आले होते. त्यावेळी त्यांच्या विरोधात शिवसेनेचे मधुकर तळपडे आणि भाजप कडून लढलेले अशोक भांगरे पराभूत झाले. मात्र २०१९ विधानसभे पूर्वी पिचड पितापुत्र भाजपवासी झाले. मात्र अकोल्याच्या जनतेला त्यांचा हा निर्णय काहीसा रुचला नाही आणि डॉ.किरण लहामटे हे तब्बल ५८ हजार मतांवर पुढे जात निवडून आले. लहामटे यांना मिळालेली मतांची आघाडी ही शरद पवार या नावाची जादू होती हे कोणीही नाकारू शकणार नाही.
दरम्यान मिळालेल्या माहिती नुसार अकोले चे विद्यमान आमदार किरण लहामटे हे राष्ट्रवादी अजित पवार गटात आहेत. त्यामुळे त्यांचा २०२४ विधानसभा निवडणुकी साठी महायुती कडून क्लेम आहे. या परस्थितीत महायुतीत भाजप मध्ये असलेले वैभव पिचड यांचे काय? असा प्रश्न आहे. या पार्श्वभूमीवर जेष्ठनेते मधुकर पिचड आणि पुत्र माजी आ.वैभव पिचड यांना शरद पवारांच्या राष्ट्रवादी शिवाय पर्याय नसल्याचे दिसून येत आहे. आजच शरद पवार दिवंगत अशोक भांगरे यांच्या ६१ व्या जयंती सोहळ्यास अकोले शहरात आहेत. या दरम्यान पिचड कुटुंबाने साहेबांची भेट मागितली असल्याची चर्चा आहे.
दिवंगत नेते अशोक भांगरे यांच्या ६१ व्या जयंती उत्सव सोहळ्याच्या निमित्ताने राष्ट्रवादी काँग्रेस शरदचंद्र पवार पक्षाचे अध्यक्ष खा.शरद पवार उद्या शुक्रवारी अकोले शहरात येत आहेत. यानिमित्ताने अकोले शहरातील बाजार तळावर एका भव्यदिव्य कार्यक्रमाचे आयोजन भांगरे कुटुंबाच्या वतीने करण्यात आले आहे. कार्यक्रम आदरणीय दिवंगत नेते भांगरे यांना ६१ व्या जयंती सोहळ्या निमित्ताने आदरांजली वाहण्याचा असला आणि यामागे भांगरे कुटुंबासह एकूणच अकोले तालुक्यातील जनतेचा प्रेमाचा भावबंध असला तरी अवघ्या दोन-अडीच महिन्यावर विधानसभा निवडणुका आलेल्या असताना शरद पवार येत असल्याने अकोल्याचे राजकारण ढवळून निघणार आहेत. या कार्यक्रमाचे आयोजन अकोले राष्ट्रवादी काँग्रेस शरद पवार गट, यशवंत युथ फाउंडेशन यांच्या वतीने करण्यात आले आहे. राष्ट्रवादी कॉंग्रेसचे प्रदेशाध्यक्ष जयंत पाटील, काँग्रेसचे जेष्ठनेते बाळासाहेब थोरात उपस्थित असणार आहेत. या कार्यक्रमास उपस्थित राहण्याचे आवाहन अगस्ती कारखान्याच्या उपाध्यक्षा सुनीता भांगरे, जिल्हा सहकारी बँकेचे संचालक अमित भांगरे, दिलीप भांगरे, विजय भांगरे आदींनी केले आहे. तत्पूर्वी शरद पवार गुरुवारी रात्री नगर शहरात मुक्कामी असणार आहेत. विधानसभा निवडणुका नजीक असताना पवार दोन दिवस जिल्ह्यात असल्याने राजकीय घडामोडींना वेग येणार आहे. २०१९ ला जिल्ह्यातील सहा विधानसभा मतदारसंघात राष्ट्रवादी काँग्रेसने विजय प्राप्त केला होता. राष्ट्रवादी मधील फुटी नंतर रोहित पवार आणि प्राजक्त तनपुरे हे दोन आमदार वगळता इतर चार आमदार अजित पवार यांच्या सोबत गेले. मात्र लोकसभा निवडणुकी पूर्वी निलेश लंके यांनी आमदारकीचा राजीनामा देत पुन्हा शरद पवार गटात येत लोकसभा निवडणूक लढवत जिंकली. त्यामुळे अकोलेचे आ.किरण लहानटे, नगरचे आ.संग्राम जगताप आणि कोपरगावचे आ.आशुतोष काळे हे तीन आमदार अजित पवारांच्या राष्ट्रवादी मध्ये आहेत. या पार्श्वभूमीवर शरद पवार नगर, अकोले आणि कोपरगाव मध्ये नव्याने राजकीय गणिते जुळवून ही तीनही मतदारसंघ आपल्याकडे खेचण्यासाठी चाचपणी करतील अशी शक्यता आहे.
चौकट:
२०१९ विधानसभा निवडणुकीचे निकाल आश्चर्यकारक लागले. पवारांच्या राष्ट्रवादीने जादूमय कामगिरी केली आणि राज्यात साहेबांनी उद्धव ठाकरेंना सोबत घेत नवे आणि ऐतिहासिक राजकीय समीकरण बनवत महाविकास आघाडी सरकार सत्तेत आणले. पुढे एकनाथ शिंदे आणि अजित पवार यांच्या पक्षांतर्गत राजकीय बंडानंतर राज्यात नवीन समीकरणे पुढे आली. या नव्या समीकरणात अनेक राजकीय नेत्यांच्या तात्कालिक भूमिका आणि निर्णय यामुळे जो तिढा निर्माण झालाय तो येणाऱ्या विधानसभा निवडणुकीच्या निमित्ताने पुढे येत असताना नवा राजकीय ट्विस्ट निर्माण झाला आहे.
अकोले मतदातसंघ या नव्या समीकरणाला अजिबात अपवाद नसून त्यामुळेच दिवंगत अशोकराव भांगरे यांच्या ६१ व्या जयंती कार्यक्रमास साहेबांची उपस्थिती ही येणाऱ्या विधानसभेच्या संभाव्य उमेदवारांची राजकीय बुद्धिबळाच्या पटलावर जागा निश्चित करणारी असणार आहे.
दिवंगत अशोकराव भांगरे यांनी आपल्या राजकीय जीवनात विविध पक्षांकडून निवडणुका लढवल्या. पाच वेळी निकराचे प्रयत्न करूनही त्यांना यश मिळाले नाहीच. भांगरे परिवाराचे मोठे योगदान आदिवासी बहुल असलेल्या अकोले तालुक्याला आणि आदिवासी चळवळीला आहे. मात्र संयमी पण दिलखुलास बोलके व्यक्तिमत्त्व असलेले अशोकराव यांना आमदारकी पासून तालुक्याने वंचित ठेवले ही वस्तुस्थिती आहे. अशोकरावांनी कधीही द्वेषाचे राजकारण केले नाही. तरीही पराभव त्यांना आला. मात्र या दरम्यान त्यांची वैयक्तिक नाळ ही शरद पवार यांच्याशी कायम राहिली. त्यांच्या निधनाला वर्ष उलटले असताना त्यांचा ६१ वा जयंती सोहळा अकोले तालुका साजरा करताना या कार्यक्रमास खुद्द शरद पवार येत आहेत. अकोले मतदारसंघातील नागरिकांनी पवार साहेबांवर भरभरून नेहमीच प्रेम केले आणि साहेबांनी पण या तालुक्याला कधी काही कमी पडू दिले नाही.
मात्र २०१९ दरम्यान अनेक राजकीय घडामोडी अकोले तालुक्यात झाल्या. पिचड कुटुंब शरद पवार यांच्या पासून दूर गेले. निवडून आलेले आ.लहामटे यांनीही गेल्या वर्षी साहेबांची साथ सोडत अजित पवारांना साथ दिली. या दरम्यान भांगरे कुटुंबाने शरद पवार यांच्या सोबत राहणे पसंत केले. आता शरद पवार विधानसभा निवडणुका समोर असताना तालुक्यात स्व.भांगरे यांच्या कार्यक्रमास येत असताना त्यांच्या भाषणाकडे अकोल्याच्या सर्व राजकारण्यांचे डोळे आणि कान असणार हे निश्चित. शरद पवार आपली भूमिका साधारण पणे अगदी स्पष्ट न बोलता संकेत देत असतात. त्यामुळे पवारांचा कल नेमका कुणाकडे असेल याची उत्सुकता भांगरे कुटुंबासह पिचड आणि लहामटे यांनाही असणार आहे. कारण साहेबांचा वरदहस्त ज्याच्या डोक्यावर असेल त्याची विधानसभेची “मत-लावनी” भरघोस असणार यात शंका नसणार आहे.
